வவுனியா நூலகத்துக்கு அருகிலுள்ள பூங்காவைப் புனரமைக்குமாறு பொதுமக்கள் வேண்டுகோள்;

வவுனியா பொது நூலகத்துக்கு அண்மையில் உள்ள பூங்காவைப் புனரமைக்குமாறு பொதுமக்கள் வேண்டுகோள் விடுத்துள்ளனர். வவுனியா நகரத்தின் மத்தியில் அமைந்துள்ள இந்தப் பூங்காவுக்கு தினமும் ஏராளமான பொதுமக்கள் சென்று வருகின்றனர். 

 

இங்கு சிறுவர்கள் விளையாடுவதற்கு என அமைக்கப்பட்ட உபகரணங்கள் பழுதடைந்த நிலையில் காணப்படுகின்றன. அநேகமான உபகரணங்கள் துருப்பிடித்த நிலையில் உள்ளதால் சிறுவர்கள் இவற்றை உபயோகிப்பதில் தயக்கம் காட்டி வருகின்றனர்.

 

இதேவேளை அவர்கள் விளையாட முடியாத நிலையில் மன உளைச்சலுக்கும் உள்ளாகி வருகின்றனர். இதனால் இங்குவரும் சிறுவர்கள் தமது பெற்றோருடன் முரண்படுவதுடன் அழுதுபுலம்புவதையும் காண முடிகின்றது.

 

இந்த உபகரணங்களைப் பழுதுபார்ப்பதுடன் சிறுவர்களின் மனதைக் கவரும் வகையில் வர்ணம் தீட்டுமாறு பெற்றோர் வேண்டுகோள் விடுத்துள்ளனர். மேலும் இங்கு காணப்படும் பூச்சிகளை ஒழிப்பதற்கு உரிய நடவடிக்கை எடுக்குமாறும் வேண்டுகோள் விடுக்கப்பட்டுள்ளது.