கிளிநொச்சி ஆலயங்களில் பெருமளவு நகைகள், பொருட்கள் கொள்ளை! இரு வர்த்தக நிலையங்களும் தீக்கிரை

கிளிநொச்சி- ஸ்கந்தபுரம் கிராமத்தில் ஆலயங்கள், வர்த்தக நிலையங்கள் உடைக்கப்பட்டு பெருமளவு நகைகள், பொருட்கள் கொள்ளையிடப்பட்டுள்ளதுடன், இரண்டு வர்த்தக நிலையங்கள் எரித்து நாசமாக்கப்பட்டுள்ளன. இந்தச் சம்பவம் கடந்த 21ம்திகதி இரவு இடம்பெற்றிருப்பதாக தெரிவிக்கப்படுகின்றது. சம்பவத்தில் ஸ்கந்தபுரம் சந்தைப் பகுதியிலுள்ள புடவையகம் மற்றும் தையலகம் என்பன முற்றாக எரித்து நாசமாக்கப்பட்டுள்ளது. சம்பவம் இரவு 1 மணியளவில் இடம்பெற்றதாகவும், வர்த்தக நிலையங்கள் எரிந்து கொண்டிருப்பதை அவதானித்த அயலவர்கள் சிலர் கூச்சலிட்டு ஏனையவர்களையும் அழைத்துள்ளதுடன், இராணுவத்தினருக்கும் தகவல் கொடுத்துள்ளனர்.

எனினும் அனைவரும் அங்குவந்து தீயை கட்டுப்பாட்டிற்குள் கொண்டுவருவதற்குள் வர்த்தக நிலையங்கள் இரண்டும் முற்றாக எரிந்து நாசமாகியுள்ளன. இந்நிலையில் ஸ்கந்தபுரம் முருகன் ஆலயம், நாகதம்பிரான் ஆலயம் ஆகியவற்றிலும் கொள்ளைகள் இடம்பெற்றுள்ளமை நேற்றுக் காலையே தெரியவந்துள்ளது.

குறித்த இரு ஆலயங்களிலும் மூல விக்கிரகங்கள் பெயர்க்கப்பட்டு விக்கிரகங்களின் கீழுள்ள யந்திர தகடுகள் கொள்ளையிடப்பட்டுள்ளதுடன், ஆலயங்களிலிருந்த உண்டியல்களும் உடைத்துக் கொள்ளையிடப்பட்டுள்ளது. இதேபோல் அக்கராயன்- அம்பலப்பெருமாள் சந்தியிலுள்ள வர்த்தக நிலையமொன்றும் உடைத்து அங்கிருந்த பொருட்களும் கொள்ளையிடப்பட்டுள்ளது.

ஒரு இரவில் இடம்பெற்ற இந்த கொள்ளை மற்றும் வர்த்தக நிலையங்கள் தீக்கிரையாக்கப்பட்ட சம்பவம் கிராமத்தில் பெரும் பரபரப்பை ஏற்படுத்தியுள்ளது. மேலும் எரிந்துபோன வர்த்தக நிலையங்களிலிருந்த பொருட்களின் பெறுமதி பல 10 லட்சத்திற்கும் மேல் என தெரிவிக்கப்படுவதுடன், அம்பலப்பெருமாள் சந்தியிலுள்ள வர்த்தக நிலையத்திலிருந்து குளிர்பானங்கள், உணவுப் பொருட்கள் மற்றும் ஒரு தொகைப் பணம் ஆகியன கொள்ளையிடப்பட்டிருப்பதாக தெரிவிக்கப்படுகின்றது.